ណាននិញ-ចិន៖ ធនាគារអភិវឌ្ឍន៍ជនបទ និងកសិកម្ម (ARDB) និងបណ្ឌិតសភាវិទ្យាសាស្ត្រក្វាងស៊ី ( Guangxi Academy of Science – GXAS) ដែលមានមូលដ្ឋាននៅទីក្រុងណាននិញ ខេត្តក្វាងស៊ី សាធារណៈរដ្ឋប្រជាមានិតចិន បានចុះអនុស្សរណៈយោគយល់គ្នាទៅវិញទៅមក ដើម្បីបង្កើតឱ្យមានសមិទ្ធិផលជាច្រើនដែលមានប្រយោជន៍ដល់វិស័យកសិកម្មនៅកម្ពុជា។
ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទនិងកសិកម្ម រួមនិងសហការី កាលពីថ្ងៃរសៀលថ្ងៃទី២៤ ខែកញ្ញា ឆ្នាំ២០២៤បានអញ្ជើញចូលរួមពិភាក្សា ការងារ និងចុះអនុស្សរណៈយោគយល់ ជាមួយនិងបណ្ឌិតសភាវិទ្យាសាស្ត្រក្វាងស៊ី ( Guangxi Academy of Science – GXAS)។
ក្នុងឱកាសនោះផងដែរ, ឯកឧត្តមបណ្ឌិត កៅ ថាច បានធ្វើការវាយតម្លៃខ្ពស់លើកិច្ចខិតខំប្រឹងប្រែង និងសហការគ្នា របស់ក្រុមការងារទាំងពីរបាន ដែលសម្រេចនិងបានឈានដល់ការចុះអនុស្សរណៈយោគយល់ (MOU) ជាមួយគ្នានាពេលនេះ។
ឯកឧត្តមបណ្ឌិត បានសម្តែងនូវសុទិដ្ឋិនិយមថា តាមរយៈអនុស្សរណៈនេះនឹងបង្កើតអោយ មានសមិទ្ធិផលធំៗជាច្រើន ដែលមានប្រយោជន៍ដល់វិស័យកសិកម្មនៅកម្ពុជា ជាពិសេប្រយោជន៍ដល់សកសិករខ្មែរ។
ជាមួយគ្នានេះ, ឯកឧត្តមបណ្ឌិត បានស្នើទៅកាន់ ភាគីពាក់ព័ន្ធជាមួយបណ្ឌិតសភាវិទ្យាសាស្ត្រ ក្វាងស៊ី ពិនិត្យលទ្ធភាពធ្វើការវិនិយោគលើវិស័យកសិកម្មនៅកម្ពុជា ដោយនាំទៅជាមួយនូវបច្ចេកវិទ្យា និងបច្ចេកទេសថ្មីៗ ដើម្បីចូលរួមលើកកម្ពស់ទំនើបកម្មកសិកម្មនៅកម្ពុជាផងដែរ។
អនុស្សារណៈនោះ ភាគីទាំងពីរបានឯកភាពគ្នាក្នុងកិច្ចសហប្រតិបត្តិការ ដើម្បីរួមគ្នាលើកកម្ពស់ការច្នៃប្រឌិតវិទ្យាសាស្ត្រ និងបច្ចេកវិទ្យាកសិកម្មរបស់កម្ពុជា លើកកម្ពស់ផលិតភាពកសិកម្ម និងការប្រកួតប្រជែង ព្រមទាំងលើកកម្ពស់ការនាំចេញកសិផលរបស់កម្ពុជា និងការអភិវឌ្ឍន៍ជនបទ។
ទី1. កម្ចីអនុគ្រោះ និងការគាំទ្រមូលនិធិពិសេសសម្រាប់គម្រោងដាំដំណាំ ការចិញ្ចឹមសត្វ វារីវប្បកម្ម និងព្រៃឈើដែលធ្វើឡើងដោយភាគី ខ នៅកម្ពុជា ភាគី ក នឹងផ្តល់ការគាំទ្រផ្នែកហិរញ្ញវត្ថុពិសេស រួមទាំងកម្ចីអនុគ្រោះ។
ទី2. រួមគ្នាកសាងវេទិកាសម្រាប់បច្ចេកវិទ្យាកសិកម្ម និងការផ្លាស់ប្តូរហិរញ្ញវត្ថុជនបទ ភាគីទាំងពីរនឹងសហការគ្នាក្នុងការកសាងវេទិកាផ្លាស់ប្តូរបច្ចេកវិទ្យាកសិកម្ម និងហិរញ្ញវត្ថុជនបទចិន-កម្ពុជា អនុវត្តសកម្មភាពពិភាក្សាផ្សេងៗលើការច្នៃប្រឌិតបច្ចេកវិទ្យា ការអភិវឌ្ឍន៍ចុងក្រោយក្នុងវិស័យ ហិរញ្ញវត្ថុជនបទ និងបញ្ហាផ្សេងៗទៀតក្នុងវិស័យកសិកម្ម លើកកម្ពស់ការចែករំលែកចំណេះដឹង និងការផ្លាស់ប្តូរបទពិសោធន៍រវាងរង្វង់ធុរកិច្ចចិន និងកម្ពុជា ព្រមទាំងពង្រីកវិសាលភាពនៃកិច្ចសហប្រតិបត្តិការ។
ការតំរង់ទិសគោលនយោបាយ និងសេវាកម្មហិរញ្ញវត្ថុ គឺ ទី ១ ភាគី ក បន្តដើរតួនាទីជាធនាគារគោលនយោបាយ ផ្តល់អាទិភាពដល់ការជួយដល់គម្រោងហិរញ្ញប្បទានកសិកម្មស្របតាមយុទ្ធសាស្ត្រអភិវឌ្ឍន៍ជាតិ និងធានាថាគោលនយោបាយផ្តល់ផលប្រយោជន៍ដល់សហគ្រាសកសិកម្មដែលភាគីខសហការ។
ចំណុទី 2 ភាគី ក នឹងរៀបចំ និងផ្តល់ផលិតផលហិរញ្ញវត្ថុជាច្រើនប្រភេទសម្រាប់ភាគី ខ រួមទាំងប្រាក់កម្ចីរយៈពេលមធ្យម និងរយៈពេលវែង ស្របតាមតម្រូវការនៃគម្រោងសហប្រតិបត្តិការ និងលក្ខណៈនៃសហគ្រាសវិទ្យាសាស្ត្រ និងបច្ចេកវិទ្យារបស់ភាគី ខ ហើយផ្តោតលើការជួយដល់ការផ្លាស់ប្តូរ និង ការអនុវត្តសមិទ្ធិផលបច្ចេកវិទ្យាក្នុងវិស័យកសិកម្មឆ្លាតវៃ និងកសិកម្មអេកូឡូស៊ី។
ការពង្រីកបណ្តាញនាំចេញកសិផល គឺ ភាគី ក ប្រើប្រាស់មធ្យោបាយហិរញ្ញវត្ថុ ហើយភាគី ខ ពឹងផ្អែកលើកម្លាំងវិទ្យាសាស្ត្រ និងបច្ចេកវិទ្យារបស់ខ្លួន ហើយភាគីទាំងពីរបានរួមគ្នារិះរកវិធីជាច្រើនដើម្បីនាំចេញកសិផលរបស់កម្ពុជា ពង្រីកបណ្តាញនាំចេញ និងបង្កើតការប្រកួតប្រជែងអន្តរជាតិនៃផលិតផលកសិកម្មកម្ពុជា។
ចំណែក តំណាងបណ្ឌិតសភាវិទ្យាសាស្ត្រក្វាងស៊ី បានសំដែងនូវសេចក្តីពេញចិត្ត និងវាយតំលៃខ្ពស់ចំពោះកិច្ចខិតខំប្រឹងប្រែងដែលធនាគារ ARDB បានអនុវត្ត និងសម្រេចបាននាពេលកន្លងមក ហើយរាល់សកម្មភាព និងស្នាដៃរបស់ធនាគារ ARDB បានបង្ហាញពីការព្យាយាម និងជួយជំរុញអោយវិស័យកសិកម្មរបស់កម្ពុជាអោយមានភាពល្អប្រសើរឡើង។ ដូចនេះ ការចាប់ដៃគូ និងធ្វើកិច្ចសហប្រតិបត្តិការជាមួយធនាគារ ARDB របស់កម្ពុជា នៅថ្ងៃនេះ ភាគីទាំងពីរនឹងធ្វើឱ្យម្រេចបានតាមគោលដៅ និងផែនការ ដូចមានចែងក្នុងអនុស្សរណៈនេះ។
សូមបញ្ជាក់ថា ធនាគារ ARDB និងបណ្ឌិតសភាវិទ្យាសាស្ត្រក្វាងស៊ី បានចុះអនុស្សរណៈ រួមគ្នា លើកិច្ចសហប្រតិបត្តិការ ដើម្បីលើកកម្ពស់ការច្នៃប្រឌិតផ្នែកវិទ្យាសាស្ត្រ និងបច្ចេកវិទ្យាកសិកម្ម ,ចូលរួមលើកកម្ពស់ផលិតភាពកសិកម្ម និងការប្រកួតប្រជែង, និងចូលរួមលើកកម្ពស់ការនាំចេញកសិផលរបស់កម្ពុជា មកកាន់ប្រទេសចិន និងជំរុញការអភិវឌ្ឍវិស័យកសិកម្ម នៅជនបទ៕
